കെഎസ്ബിസിഡിസിയില്‍ അവസരം.. പിഎസ്‌സി വിളിക്കുന്നു; നിങ്ങള്‍ യോഗ്യരാണോ?

കേരള സ്റ്റേറ്റ് ബാക്ക്വേര്‍ഡ് ക്ലാസസ് ഡെവലപ്മെന്റ് കോര്‍പ്പറേഷന്‍ ലിമിറ്റഡില്‍ (KSBCDC) അസിസ്റ്റന്റ് മാനേജര്‍ തസ്തികയിലേക്ക് പുതിയ റിക്രൂട്ട്മെന്റ് വിജ്ഞാപനം പുറത്തിറക്കി. ആകെ ഒരു ഒഴിവാണ് ഈ തസ്തികയിലേക്ക് റിപ്പോര്‍ട്ട് ചെയ്യപ്പെട്ടിട്ടുള്ളത്. യോഗ്യരായ ഉദ്യോഗാര്‍ത്ഥികള്‍ക്ക് ജൂണ്‍ 3 വരെ ഓണ്‍ലൈനായി അപേക്ഷകള്‍ സമര്‍പ്പിക്കാവുന്നതാണ്. കേരള പിഎസ്സിയാണ് ഈ നിയമനം നടത്തുന്നത്.

കേരള സര്‍ക്കാര്‍ ജോലിയായ ഈ അസിസ്റ്റന്റ് മാനേജര്‍ തസ്തിക കാറ്റഗറി നമ്പര്‍ 19/2026 പ്രകാരം നേരിട്ടുള്ള നിയമനമാണ്. തിരഞ്ഞെടുക്കപ്പെടുന്നവര്‍ക്ക് പ്രതിമാസം 55,200 രൂപ മുതല്‍ 1,15,300 രൂപ വരെ ശമ്പളം ലഭിക്കും. അപേക്ഷകരുടെ പ്രായം 2026 ജനുവരി 1-ന് 18 വയസ്സിനും 40 വയസ്സിനും ഇടയിലായിരിക്കണം. 1986 ജനുവരി 2-നും 2008 ജനുവരി 1-നും ഇടയില്‍ ജനിച്ചവര്‍ക്ക് (രണ്ട് തീയതികളും ഉള്‍പ്പെടെ) അപേക്ഷിക്കാന്‍ അര്‍ഹതയുണ്ടായിരിക്കും.

ഒ ബി സി, എസ് സി / എസ് ടി വിഭാഗക്കാര്‍ക്ക് സാധാരണ പ്രായപരിധി ഇളവുകള്‍ ലഭ്യമാണ്. എന്നാല്‍ പരമാവധി 50 വയസ്സില്‍ കൂടാന്‍ പാടില്ല. അംഗീകൃത സര്‍വകലാശാലയില്‍ നിന്നുള്ള ഏതെങ്കിലും വിഷയത്തിലെ ബിരുദം, കേന്ദ്ര / സംസ്ഥാന സര്‍ക്കാരുകള്‍ അംഗീകരിച്ച സ്ഥാപനങ്ങളില്‍ നിന്നുള്ള എം ബി എ ബിരുദം, പി ജി ഡി സി എ എന്നിവയാണ് ഈ തസ്തികയിലേക്കുള്ള വിദ്യാഭ്യാസ യോഗ്യതകള്‍.

എം ബി എയും പി ജി ഡി സി എയും റെഗുലര്‍ കോഴ്സുകളായിരിക്കണം. എം ബി എ നേടിയ ശേഷം പൊതുമേഖലാ സ്ഥാപനങ്ങളിലോ രജിസ്റ്റര്‍ ചെയ്ത സ്ഥാപനങ്ങളിലോ സൂപ്പര്‍വൈസറി കേഡറില്‍ രണ്ട് വര്‍ഷത്തെ പ്രവൃത്തി പരിചയവും നിര്‍ബന്ധമാണ്. ഈ നിയമനത്തിന് അപേക്ഷാ ഫീസ് ആവശ്യമില്ല. ഉദ്യോഗാര്‍ത്ഥികളെ ഷോര്‍ട്ട്ലിസ്റ്റ് ചെയ്യും, തുടര്‍ന്ന് എഴുത്തുപരീക്ഷ, രേഖാപരിശോധന, വ്യക്തിഗത അഭിമുഖം എന്നിവ വഴിയായിരിക്കും അന്തിമ തിരഞ്ഞെടുപ്പ്.

ഓണ്‍ലൈനായി അപേക്ഷിക്കുമ്പോള്‍, നിശ്ചിത മാനദണ്ഡങ്ങള്‍ പാലിക്കുന്ന ഫോട്ടോ അപ്ലോഡ് ചെയ്യണം (പുതിയ പ്രൊഫൈല്‍ ഉള്ളവര്‍ 6 മാസത്തിനുള്ളില്‍ എടുത്ത ഫോട്ടോ). വ്യക്തിഗത വിവരങ്ങളുടെ കൃത്യതയും പാസ്വേര്‍ഡിന്റെ രഹസ്യസ്വഭാവവും അപേക്ഷകന്റെ ഉത്തരവാദിത്തമാണ്. അപേക്ഷ സമര്‍പ്പിക്കുന്നതിന് മുമ്പ് പ്രൊഫൈലിലെ വിവരങ്ങള്‍ ശരിയാണെന്ന് ഉറപ്പാക്കണം.

അപേക്ഷകള്‍ ഒരു തവണ സമര്‍പ്പിച്ചാല്‍ പിന്നീട് മാറ്റങ്ങളോ തിരുത്തലുകളോ വരുത്താന്‍ സാധിക്കില്ല. ഭാവിയിലെ ആവശ്യങ്ങള്‍ക്കായി അപേക്ഷയുടെ പ്രിന്റ് ഔട്ടോ സോഫ്റ്റ് കോപ്പിയോ സൂക്ഷിക്കാന്‍ നിര്‍ദ്ദേശിക്കുന്നു. കമ്മീഷനുമായുള്ള എല്ലാ ആശയവിനിമയങ്ങള്‍ക്കും അപേക്ഷയുടെ യൂസര്‍ ഐഡി ആവശ്യമായി വരും. വിജ്ഞാപനത്തിലെ വ്യവസ്ഥകള്‍ പാലിക്കാത്ത അപേക്ഷകള്‍ നിരസിക്കപ്പെടുന്നതായിരിക്കും.

അപേക്ഷ സമര്‍പ്പിക്കാനായി www.keralapsc.gov.in എന്ന ഔദ്യോഗിക വെബ്‌സൈറ്റ് സന്ദര്‍ശിക്കുക. ഹോംപേജിലെ റിക്രൂട്ട്മെന്റ് വിഭാഗത്തില്‍ ‘അസിസ്റ്റന്റ് മാനേജര്‍’ തസ്തികയുടെ വിജ്ഞാപനം ലഭ്യമാണ്. അത് ശ്രദ്ധാപൂര്‍വ്വം വായിച്ച് യോഗ്യതാ മാനദണ്ഡങ്ങള്‍ ഉറപ്പാക്കിയ ശേഷം, ഓണ്‍ലൈന്‍ അപേക്ഷാ ഫോം തെറ്റുകൂടാതെ പൂരിപ്പിക്കുക. നിര്‍ദ്ദേശിച്ചിട്ടുള്ള ഫോര്‍മാറ്റിലും വലുപ്പത്തിലും രേഖകള്‍ അപ്ലോഡ് ചെയ്ത ശേഷം, വിവരങ്ങള്‍ ശരിയാണെന്ന് ഉറപ്പാക്കി അപേക്ഷ സമര്‍പ്പിക്കാവുന്നതാണ്.

കേരള പിഎസ്സിയുടെ വണ്‍ ടൈം രജിസ്‌ട്രേഷന്‍ വഴി മാത്രമേ അപേക്ഷിക്കാന്‍ സാധിക്കൂ. പ്രൊഫൈല്‍ ഉണ്ടാക്കുന്നതിന് ഫോട്ടോ, ഒപ്പ്, എസ്എസ്എല്‍സി/+2 തുല്യത സര്‍ട്ടിഫിക്കറ്റുകള്‍, ബിരുദവും മറ്റ് ഉയര്‍ന്ന സര്‍ട്ടിഫിക്കറ്റുകളും, ആധാര്‍ കാര്‍ഡ്, മൊബൈല്‍ നമ്പര്‍ എന്നിവ ആവശ്യമാണ്. ഇമെയില്‍ ഐഡി ഓപ്ഷണലാണ്.

അപേക്ഷിക്കാനുള്ള അവസാന തീയതിയായ 2026 ജൂണ്‍ 3 ബുധനാഴ്ച അര്‍ദ്ധരാത്രി 12:00-ന് മുമ്പ് യോഗ്യരായ എല്ലാ ഉദ്യോഗാര്‍ത്ഥികളും അപേക്ഷകള്‍ സമര്‍പ്പിക്കാന്‍ ശ്രദ്ധിക്കുക. കൂടുതല്‍ വിവരങ്ങള്‍ക്കും സംശയങ്ങള്‍ക്കും ഔദ്യോഗിക വെബ്‌സൈറ്റിലെ വിജ്ഞാപനം പരിശോധിക്കാവുന്നതാണ്.