ചായക്കൊപ്പം കഴിക്കാനായി വീട്ടില് തന്നെ ഉണ്ടാക്കുന്ന ഉണ്ണിയപ്പത്തിന് പ്രത്യേക സ്വാദാണ്. പുറത്ത് നിന്ന് വാങ്ങുന്നതിനെക്കാള് ചൂടോടെ തയ്യാറാക്കുന്ന ഉണ്ണിയപ്പം കൂടുതല് മൃദുവും രുചികരവുമാവും. പുറത്തേക്ക് നേരിയ ക്രിസ്പ്പും ഉള്ളില് നല്ല സോഫ്റ്റുമായ ഉണ്ണിയപ്പം ലഭിക്കണമെങ്കില് മാവിന്റെ കട്ടിയും ഉപയോഗിക്കുന്ന ഉണ്ണിയപ്പച്ചട്ടിയും പ്രധാനമാണ്.
കട്ടിയുള്ള ഗുണമേന്മയുള്ള ഉണ്ണിയപ്പച്ചട്ടി ഉപയോഗിക്കുമ്പോള് അപ്പം ഒരുപോലെ വേവുകയും ഒട്ടിപ്പോകാതിരിക്കുകയും ചെയ്യും. ചൂട് എല്ലായിടത്തും ഒരേ പോലെ ലഭിക്കുന്നതിനാല് നല്ല ബ്രൗണ് നിറത്തിലും മൃദുവായും ഉണ്ണിയപ്പം തയ്യാറാക്കാന് കഴിയും. കൂടാതെ വളരെ കുറച്ച് എണ്ണയില് തന്നെ പെട്ടെന്ന് ഉണ്ടാക്കാനാവുന്നതും ഇതിന്റെ മറ്റൊരു പ്രത്യേകതയാണ്.
ശര്ക്കര, പഴം, തേങ്ങാക്കൊത്ത് എന്നിവ ചേര്ത്തുള്ള പരമ്പരാഗത മാവിന് വീട്ടുവൈഭവ രുചിയുമുണ്ട്. വിവിധ തരത്തിലുള്ള നോണ്സ്റ്റിക്, കാസ്റ്റ് അയണ് ഉണ്ണിയപ്പച്ചട്ടികള് ഇപ്പോള് ഓണ്ലൈനില് ലഭ്യമാണ്. നല്ലൊരു ചട്ടി വീട്ടിലുണ്ടെങ്കില് എപ്പോള് വേണമെങ്കിലും എളുപ്പത്തില് നാടന് സ്റ്റൈലില് ഉണ്ണിയപ്പം തയ്യാറാക്കാം.
ഗോതമ്പുപൊടിയും റവയും ചേര്ത്ത് വളരെ എളുപ്പത്തില് മൃദുവായ ഉണ്ണിയപ്പം തയ്യാറാക്കാം. വൈകുന്നേര ചായക്കൊപ്പം എല്ലാവര്ക്കും ഇഷ്ടപ്പെടുന്ന ഒരു ലളിത പലഹാരമാണിത്.
ചേരുവകള്
ഗോതമ്പുപൊടി – ഒരു കപ്പ്
റവ – കാല് കപ്പ്
പഴം -3 എണ്ണം
ഏലക്കാപ്പൊടി – അര ടീസ്പൂണ്
ജീരകപ്പൊടി – കാല് ടീസ്പൂണ്
ചുക്കുപൊടി -കാല് ടീസ്പൂണ്
ബേക്കിംഗ് സോഡ – 3/4 ടീസ്പൂണ്
ഉപ്പ് – ഒരു നുള്ള്
ശര്ക്കര – 1 കപ്പ്
തേങ്ങാക്കൊത്ത് – കാല് കപ്പ്
തയ്യാറാക്കുന്ന വിധം
ആദ്യം ഗോതമ്പുപൊടി, റവ, ഏലക്കാപ്പൊടി, ജീരകപ്പൊടി, ചുക്കുപൊടി, ബേക്കിങ് സോഡ, ഉപ്പ് എന്നിവ ഒരു പാത്രത്തില് ചേര്ത്ത് നന്നായി കലക്കുക. ശേഷം ഒരു പാനില് വെള്ളം ഒഴിച്ച് ശര്ക്കര അലിയിക്കുക. ഈ ശര്ക്കരപ്പാനി ചൂടോടെ തന്നെ പൊടിക്കൂട്ടിലേക്ക് ചേര്ത്ത് മാവ് തയ്യാറാക്കണം.
പഴം മിക്സിയില് നന്നായി അരച്ച് മാവിലേക്ക് ചേര്ക്കുക. പിന്നീട് വറുത്ത തേങ്ങാക്കൊത്തും ചേര്ത്ത് ആവശ്യത്തിന് വെള്ളം ഒഴിച്ച് മാവ് യോജിപ്പിക്കാം. ഉണ്ണിയപ്പച്ചട്ടി ചൂടാക്കി കുറച്ചു എണ്ണ ഒഴിച്ച ശേഷം മാവ് ഒഴിച്ച് ഇരുവശവും നന്നായി വേവിച്ചെടുക്കുക. പുറത്തേക്ക് ചെറിയ ക്രിസ്പ്പും ഉള്ളില് പഞ്ഞിപോലെ സോഫ്റ്റുമായ രുചിയൂറും ഉണ്ണിയപ്പം തയ്യാര്.
